16 mozos e mozas fórmanse no curso de “Prevención de riscos laborais»

O alumnado traballador do Programa de emprego “Xuventude 2023” do Concello de Val do Dubra, en colaboración cos Concellos da Baña, Negreira e Santa Comba rematou esta semana o curso básico de 60 horas en Prevención de riscos laborais.

O programa botou a andar o 2 de outubro de 2023 e conta con 16 alumnos/as traballadores/as, maiores de 18 anos e menores de 30, que estaban inscritos/as no Sistema Nacional de Garantía Xuvenil. Divídense en dúas especialidades: “Atención sociosanitaria a persoas dependentes no domicilio” e “Dinamización de actividades de tempo libre educativo infantil e xuvenil”.

Transcorridos case dous meses desde o inicio da actividade, as persoas participantes, recibiron xa, xunto coa formación en prevención de riscos laborais, unha parte importante da formación teórica, tanto específica na súa correspondente especialidade como a complementaria en materias de alfabetización informática, igualdade de xénero, orientación, información e asesoramento laboral.

O Programa de Emprego “Xuventude 2023”, ten un orzamento de 424.836,96 euros e é cofinanciado pola Consellería de Promoción do Emprego e Igualdade e o Fondo Social Europeo+ 2021-2027. Organízase co dobre obxectivo de formar a persoas que se atopan en situación de desemprego en sectores con demanda de traballadores e traballadoras e, tamén, realizar actuacións de interese xeral para a cidadanía. Ao finalizar, o alumnado traballador poderá optar aos correspondentes certificados de profesionalidade, instrumento de acreditación oficial das cualificacións profesionais con carácter oficial e validez en todo o territorio nacional.