OConcello de Val do Dubra en colaboración co Programa de Emprego Xuventude 2023 pon en marcha un Roteiro-concurso no 8M

O Concello de Val do Dubra en colaboración co Programa de Emprego Xuventude 2023 pon en marcha un roteiro-concurso con motivo da celebración do Día Internacional da Muller o 8 de marzo (8M).

Esta actividade busca promover o coñecemento, por parte da poboación, das mulleres relevantes no noso municipio á vez que tamén se promove o comercio local a través dos seus premios que consistirán en tres lotes de libros de igualdade.

O concurso contará con oito localizacións. distribuídas en espazos públicos de Bembibre e o reto consistirá en adiviñar cales son. En cada un dos oito puntos haberá un código QR que as persoas participantes poderán descargar cos seus móbiles para obter a información sobre 8 mulleres e/ou colectivos do noso concello. As persoas que desexen participar no concurso terán que atopar os 8 códigos, e polo tanto a súa localización, coa información sobre as mulleres.

En cada unha das paradas deberán sacar unha foto selfie onde se vexa á persoa participante e o código QR da muller de fondo para despois envialo por correo electrónico a igualdade@valdodubra.gal indicando o nome e apelidos, DNI e teléfono, xunto coas 8 fotos co selfie que certifiquen que se completou a ruta coa busca completa.

O prazo para participar esténdese desde o 8 marzo ata o 20 de marzo ás 15:00 horas e o sorteo para escoller os gañadores farase o 21 de marzo na sesión ordinaria do Pleno da corporación. Consulta as bases aquí.

Ademais desta actividade, o Concello de Val do Dubra, organiza unha conferencia da Secretaria Xeral do Sindicato Labrego Galego, Isabel Vilalba Seivane, o vindeiro venres ás 20:30 horas no salón de actos da Casa da Cultura.

Isabel vén de asinar, xunto a outros 30 representantes da vida política, social e cultural de Galicia, unha carta aos ministros de asuntos exteriores dos estados membros da Unión Europea reclamando o recoñecemento do galego como lingua oficial da UE.

Ademais, a labrega e Secretaria Xeral do SLG, forma parte do catálogo de referentes da asociación Alingua (Asociación de Entidades Locais pola Lingua Galega, da que forma parte o noso concello), onde se recollen figuras destacadas de diferentes ámbitos sociais e culturais que desenvolven en galego tanto o seu día a día coma a súa traxectoria profesional.

Esta conferencia está promovida polo Servizo de Normalización Lingüística de Val do Dubra.