Val do Dubra pon en marcha a instalación e recollida do contedor marrón para a mellor xestión de residuos orgánicos cunha campaña informativa de uso e sensibilización

O Concello de Val do Dubra pon en marcha unha nova campaña de reciclaxe centrada na correcta xestión dos residuos orgánicos mediante a introdución do contedor marrón. Esta iniciativa xorde da crecente necesidade de mellorar a separación e tratamento dos residuos orgánicos, que constitúen unha parte significativa dos residuos urbanos. A xestión adecuada destes residuos non só axuda a reducir a cantidade de lixo que acaba nos vertedoiros, senón que tamén permite a creación de biogás ou compost, un abono natural que mellora a calidade dos solos e fomenta prácticas agrícolas máis sustentables.

A campaña comezará a mediados de setembro coa instalación de 35 contedores marróns e posteriormente activarase a recollida nos tres núcleos urbanos: na estrada xeral de Portomouro, Bembibre e Rial ademais das rúas San Lorenzo e Corredoira.

Esta campaña incluirá tanto aos cidadáns como aos grandes produtores de residuos orgánicos do concello, como restaurantes, mercados e comercios de alimentación que tamén terán a disposición os seus contedores. Estes grandes produtores recibirán asesoramento gratuíto para intentar reducir e xestionar de mellor maneira os seus residuos orgánicos, contribuíndo así ao éxito desta iniciativa.

A implantación do colector marrón ten como obxectivo promover a reciclaxe responsable e eficiente. Un aspecto destacado desta campaña é o uso de colectores con chave, co fin de evitar o uso indebido dos mesmos. Este sistema de acceso controlado garante que só as persoas que participan activamente na separación dos residuos orgánicos poidan depositalos, asegurando que o material recollido sexa exclusivamente orgánico e evitando a contaminación con outros tipos de residuos, o que facilita o proceso de compostaxe.

Na presentación da campaña, que tivo lugar esta mañá no municipio, participaron o alcalde de Val do Dubra, Diego Luis Díaz, o tenente alcalde, Antonio Negreira e varios concelleiros acompañados de Rodrigo López Piquin, pertencente á empresa consultora Permae, e Sonia Antelo, representante da empresa adxudicataria Antelo de Santa Comba que se encargará da recollida dos residuos semanalmente.

Díaz, asegura que con este paso “complétase esta campaña de aposta polo reciclaxe que o Concello de Val do Dubra ten en marcha desde hai uns anos, despois de diferentes entregas de composteiros que se levan feito neste mandato e que están funcionando moi ben. Trátase dunha proba, na que somos conscientes da complexidade que coller este hábito, pero entendemos que totalmente necesaria especialmente nas zonas urbanas, nas que hai pisos, para que sigan a liña das casas que xa fan a compostaxe; é unha aposta para protexer o noso medioambiente e agardamos que a xente se comprometa, poña da súa parte e que derive nun éxito para que o noso municipio Val do Dubra sexa exemplo a seguir”.

Pola súa parte, Antonio Negreira destacou que deste xeito “mellórase un servizo básico que axudará tamén na sensibilización, da necesidade de reducir a produción de residuos. É importante xestionar ben estes residuos pero tamén o é diminuír a creación dos mesmos e para iso servirá tamén a visita aos nosos veciños”.

Así, seguiranse entregando composteiros e farase unha asesoría porta a porta por parte da empresa consultora Permae facendo a correspondente explicación do sistema e entregando as chaves do colectores, co fin de que se empregue dun xeito responsable os residuos propios para este contedor. Aqueles veciños que non se atopen nos seus domicilios nos días de visita establecidos, poderanse recoller na Casa do Concello ou solicitándoo por teléfono ou correo electrónico. Ademais da chave do colector, entregase un recipiente e un paquete de bolsas biodegradables co que facer a recollida no domicilio e logo depositalo no contedor marrón máis próximo.

Desde a empresa de recollida destacan o compromiso con esta aposta, dando información en caso de ser necesaria para os veciños e veciñas. Informan que a recollida será os venres para mellor xestión de particulares e empresas.

Por parte de Permae, agradecen a confianza do Concello de Val do Dubra nesta campaña e engaden que chegará tamén aos centros educativos para concienciar desde a infancia. Ofrecerán un servizo informativo do uso dos colectores co fin acadar un bo uso do contedor marrón. Ademais apuntan que coa tecnoloxía coa que están dotados os contedores saberán cal é o comportamento de cada veciño para informar e formar, no caso de ser necesario, máis en detalle a aqueles que descoñezan o funcionamento ou non fagan o uso máis apropiado destes.

Para participar na campaña, os cidadáns poden rexistrarse a través do enlace https://valdodubra.rsu.gal/ e reservar o seu “pack” de uso, que inclúe:

• Chave de acceso ao colector.
• Caldeiro para a separación dos residuos orgánicos.
• Bolsas compostables, indispensables para o uso do colector marrón.
• Díptico informativo.

Para máis información, pódese chamar ao 647 521 464 ou enviar un correo a residuos@valdodubra.gal.