Val do Dubra formaliza a ocupación e pagamento dos terreos do polígono de Bembibre por valor de 512.085,02 euros con acordo maioritario dos propietarios

O Concello de Val do Dubra deu hoxe un paso decisivo cara á creación do futuro polígono industrial de Bembibre coa sinatura das actas de ocupación e o pagamento, por valor de 512.085,02 euros en total, das 15 parcelas afectadas polo proxecto.

Formalizouse así o trámite clave dentro do proceso de expropiación urbanística, contando cun acordo maioritario das persoas propietarias, o que facilita o avance dunha infraestrutura estratéxica para o desenvolvemento económico do municipio.

Esta actuación permitirá desbloquear definitivamente un proxecto histórico para Val do Dubra, que busca dotar ao concello do seu primeiro solo industrial planificado e competitivo. O ámbito sitúase nunha zona considerada clave, fronte á antiga fábrica da Telleira e con conexión prevista cara Faxón, ofrecendo unha localización axeitada para a implantación de empresas.

Desde o goberno local destacan que este paso supón “un avance fundamental” para dar resposta á demanda existente de solo empresarial por parte de pequenas e medianas empresas da contorna, que levan tempo reclamando espazos ben comunicados e con servizos.

O proxecto conta cun longo percorrido administrativo que se inicia no ano 2005. O Concello tramitou, entre outras, unha Modificación puntual das Normas Subsidiarias (Modificación puntual nº3) na que se propoñía “redelimitar o Solo apto para urbanizar industrial, ampliando o seu ámbito cara ó solo non urbanizable normal e destinar a parte restante do primeiro, que xa se atopa parcialmente edificada con usos non industriais, a solo apto para urbanizar de uso residencial”. Esta Modificación puntual foi aprobada definitivamente con data de 15 de abril de 2005.

Así mesmo, con data de 16 de setembro de 2010 o Pleno do Concello de Val do Dubra aprobou definitivamente o Plan de sectorización do Solo Apto para Urbanizar Industrial, de conformidade co disposto no artigo 92 da Lei 9/2002, de 30 de decembro, de ordenación urbanística e protección do medio rural de Galicia e no artigo 70 da Lei 7/1985, de 2 de abril, reguladora das bases do réxime local.

Por acordo da Xunta de Goberno Local de data 2 de decembro de 2022 aprobouse inicialmente o proxecto de expropiación forzosa para a obtención dos terreos para o desenvolvemento do Plan de sectorización do SAUI e a execución do polígono industrial, polo procedemento de taxación conxunta.

En decembro do ano 2025 culminouse o expediente coa aprobación definitiva, logo das xuntanzas mantidas cos propietarios e da resolución das alegacións presentadas. Deste xeito, o procedemento iniciado hai máis de 20 anos culmina na xornada de hoxe coa ocupación efectiva dos terreos e o pagamento dos mesmos.

Unha vez completado este proceso, o Concello centrará os seus esforzos en definir a fórmula máis axeitada para o desenvolvemento do polígono, avaliando distintas opcións que permitan axilizar a súa posta en marcha e garantir a súa viabilidade.

O executivo local subliña que a creación do polígono de Bembibre será clave para fixar actividade económica e emprego en Val do Dubra, evitando a saída de proxectos empresariais cara outros municipios da comarca compostelá.

Así mesmo, esta iniciativa complétase con outras actuacións en marcha, como a mellora da seguridade viaria na travesía da capital municipal, co obxectivo de adaptar as infraestruturas ao incremento de tráfico asociado ao desenvolvemento industrial.