Val do Dubra acolle por primeira vez as Feiras do Abril nas rúas centrais de Bembibre do 30 de marzo ao 1 de abril

A cita, que se prolongará do 30 de marzo ao 1 de abril, ven de presentarse no Concello de Val do Dubra nun acto en que participou Antonio Leira, deputado provincial, o alcalde Diego Luis Díaz, o primeiro tenente alcalde Antonio Negreira e a concelleira Carmen Vilacoba

O cambio de ubiación busca dinamizar o centro do pobo para que o comercio e hostalería local acollan aos visitantes e veciñanza á vez que comerciantes, artesáns e artesás da zona dan a coñecer o seu bo facer nos postos da carpa. O luns, coma sempre, a Festa da Empanada mantense no Campo da Feira

20/03/24. Val do Dubra prepárase para unha das citas máis agardadas polos veciños e veciñas: as Feiras do Abril. Así, os días 30 e 31 de marzo e o 1 de abril o municipio renderase á troula, con tres xornadas de actividades que se desenvolverán por vez primeira no centro do núcleo de Bembibre, nos aparcadoiros da rúa San Lourenzo, onde se instalará unha carpa que albergará o Mercado de Artesanía organizado polo Concello de Val do Dubra en colaboración coa Deputación da Coruña. Será punto de encontro para os artesáns e artesás locais e outros e outras que se acheguen dende outras localidades. Así, co cambio de localización, a hostalería e comercio local vivirán de primeira man o ir e vir dos visitantes.

En harmonía co valor e potencial gandeiro e agrícola da localidade, a cita contará cunha exposición de maquinaria agrícola (sábado e domingo) e unha exhibición de gando (domingo a partir das 10.30 h.) na que participarán gandeiros e gandeiras do municipio e na que se porá en valor unha das especies protagonistas da zona: a vaca cachena. Nesta ocasión tamén participarán na exposición cabalos procedentes da Fundación Monte do Gozo – Proxecto Home das Cernadas (Val do Dubra).

A inauguración será o sábado 30 ás 12 do mediodía coa actuación de Regueifa, asociación dubresa de música tradicional. Chegada a hora do xantar, coma en toda feira apreciable non pode faltar a polbeira. Entrados na tarde, o toque de humor poñerao Pepo Suevos, quen ofrecerá un monólogo ás 18.30 h. Á noite, a verbena virá da man da Discomóbil CDC e da Orquestra Metrópolis.

A cativada terá un achegamento aos xogos tradicionais nas dúas xornadas da fin de semana a partir das 17.00 h e, tamén os dous días, haberá demostracións dalgúns dos artesáns, artesás e dos comerciantes participantes. Tamén haberá actividades sorpresa para todos os públicos na xornada de domingo a tarde.

O luns, 1 de abril, chega una cita gastronómica moi agardada: a Festa da Empanada. Será momento de gozar deste manxar tan afamado ao mesmo tempo que, no posto da polbeira, haberá degustación de vaca cachena. A música correrá a cargo do dúo Matices.

Chega así un dos eventos de referencia da comarca que sitúa a Val do Dubra como destino a elixir nunhas xornadas cheas de tradición, que axudan a mergullarse na cultura local. Así, o deputado provincial Antonio Leira, aproveitou para felicitar o Concello de Val do Dubra pola posta en marcha dun evento “que vén a recuperar as tradicións tan arraigas entre a veciñanza, polo que a Deputación da Coruña decidiu apostar pola colaboración co municipio para desenvolver o mercado de artesanía que tamén acolle a comerciantes locais”.

Pola súa parte, o alcalde Diego Luis Díaz convida a todos os veciños e traslada o seu agradecemento “a todos os que fan posible que un evento coma este sexa posible, mención especial neste ano á Deputación por colaborar co Concello para achegar un mercado de artesanía e comercio local. Agardo que a veciñanza desfrute destes tres días de festa e sexa todo un éxito para os nosos comerciantes e hostaleiros locais”.

O tenente alcalde Antonio Negreira lembrou tamén a importancia da cita ao sinalar que “é un estupendo escaparate para realizar transaccións económica á vez que, pola súa tradición e historia, se converte cada ano nun referente social e de reencontro para miles de persoas de toda a comarca que comparten vivenzas, valores e cultura”. 

PROGRAMA:

Sábado 30 de marzo – Aparcadoiro San Lourenzo

12.00 h. – Inauguración das Feiras do Abril

• Actuación de Regueifa

Desde as 12.00 -Xogos Tradicionais

– Exposición de maquinaria agrícola

18.30 h. – Monólogo Pepo Suevos

23.00 h. – Orquestra Metrópolis e Discomóbil CDC

Domingo 31 de marzo – Aparcadoiro de San Lourenzo

11.00 h. – Exposición de gando

• Exposición maquinaria agrícola
• Xogos tradicionais

13.00 h. – Vermú con Alborada

17.30 h. – Actividades de dinamización para todos os públicos

Luns 1 de abril – Campo da Feira

Festa da Empanada

Celebración do programa Hoy por Hoy da Cadena Ser desde a Feira

Mercadillo de primeiro de mes

Polbeira e música do Dúo Matices