Que é?
Apego é un programa de dinamización sociolingüística que busca incrementar a porcentaxe de nenos e de nenas que reciben o galego desde o berce e que promove e apoia o seu uso na socialización.
Desenvólvese colaborativamente entre varios concellos para lograr que a nosa lingua estea presente de maneira integral no contexto familiar e social en que viven os nenos e nenas, desde o nacemento ata que comezan a etapa escolar.
Apego procura facilitar información e argumentos positivos….
– cando as familias nos visitan para adherirse ao programa
– no material que inclúe a caixa que lles entregamos ao se inscribiren
– a través das canles de comunicación que mantemos
Apego achega recursos para a socialización en galego…
– colaborando a que se coñezan os que están dispoñibles
– creando outros novos
– promovendo que outras entidades se sumen a este obxectivo
Apego crea redes e comunidade….
– pon en contacto moita xente e moitas entidades
– facilita o encontro entre familias que están interesadas na crianza en galego
– promove a colaboración de xeito transversal cos obxectivos do programa
Apego arroupa a crianza en galego…
– informando de convocatorias, espazos, materiais etc.
– promovendo e programando actividades que faciliten a socialización
– ofrecendo recursos e formación aos profesionais que traballan cas nenas e nenos
A quen vai dirixido?
Apego vai dirixido a vós, ás familias que vos estades a preparar para a chegada dun novo membro e tamén ás que tedes nenos e nenas ata 6 anos. Queremos axudar á socialización en galego e propoñervos o uso da lingua galega para crear vínculos coa familia, para asentar o arraigo a esta terra, porque a lingua que mamamos, na que aprendemos a falar, vai ser a base da identidade futura do voso fillo ou da vosa filla. A lingua de cada pobo é un tesouro irrepetible e tamén é a cerna que lle permite existir e descubrir o mundo. Únete a nós no Apego, porque cremos no noso futuro.
Co fin de que a información chegue de maneira máis efectiva, todas as familias que estean agardando un bebé ou teñan crianzas ata 6 anos poden adherirse ao programa. Para facelo cómpre que visiten o Servizo de Normalización Lingüística do Concello de Val do Dubra (1º andar) cun anaco de tempo para manter unha pequena entrevista na que lles entregamos a caixa de benvida. É necesario concertar a cita e pódese facer enviando un correo a andrea.muino@valdodubra.gal ou chamando ao teléfono 981 889 000.
Ligazóns de interese:
—
Para máis información sobre o programa pode contactar con Andrea Muíño Quintáns,Técnica de Normalización Lingüística do Concello de Val do Dubra.
Tfno.: 981 889 000