11/10 VAS RIR – «CABARÉ CLIMÁTICO» Auditorio Municipal 21.00 h
En 2075, o cambio climático xa non é un aviso: é a nosa realidade. Pero, máis aló das consecuencias que todos imaxinamos, que pasará coas relacións entre persoas, coas parellas ou co noso carácter? “Vas Rir – Cabaré Climático” combina música en directo e humor para facerche reflexionar… ou simplemente para que pases un bo rato ríndo.
No escenario estarán Cristian Leggiero, Luis Iglesia e Paty Lesta, que traen vida e risa a esta proposta teatral única para público adulto.
17/10 XAROPE TULÚ «COROCHAS» Escola infantil 11.00 h
Corochas é un espectáculo de pequeno formato de monicreques e narración oral dirixido á primeira infancia (0-3 anos), cunha duración de 40 minutos.
Combina a narración de contos acumulativos, a manipulación de obxectos, a música, a canción e o xogo de imitación para levar aos pequenos viaxeiros por diversas paisaxes e facerlles coñecer personaxes estrafalarios que deben resolver múltiples enredos. As sensacións de “corochas” —tamén chamadas cachogas, celigras, cóchegas, coscas ou deligras— xorden cando alguén toca levemente certas partes do corpo, provocando un riso involuntario.
Por que existen tantos nomes para estas sensacións? Quizais porque cada un é único ou porque as corochas só existen en determinados lugares… Os contos, coma as corochas, fannos viaxar a lugares onde normalmente non chegamos ou a partes do corpo ás que non prestamos atención. A actriz e manipuladora do espectáculo é Atenea García, e a produción corre a cargo de Xarope Tulú.
18/10 CONCERTO: «VELADA MUSICAL CON VIRTUOSI VIOLINI» Auditorio Municipal 19.00 h
Virtuosi Violini presenta unha noite de música con un programa pensado para mostrar a riqueza do repertorio para violín e piano, desde barroco ata romántico:
Programa destacado:
- Alegría Hernández MartínezCharles Dancla (1817 – 1907) – Air Varié, Op. 89 nº 1 sobre un tema de Giovanni Pacini y Air Varié, Op. 89 nº 5 sobre un tema de Joseph Weigl
- Aine Durán TakebeEdward Mollenhauer (1827 – 1914) – The Boy Paganini
- Lucía Vieito AradasCharles-Auguste de Bériot (1802 – 1870) – Scène de Ballet, Op. 100
- Antía Pérez LadoGiuseppe Tartini (1692 – 1770) – Sonata “Didone Abbandonata” en Sol menor: I. Larghetto affettuoso, II. Allegro
- Di Yang YinJohann Sebastian Bach (1685 – 1750) – Partita nº 2 en re menor para violín solo, BWV 1004: Gigue
- Sofía Quinteiro CiobotaruHenri Vieuxtemps (1820 – 1881) – Concierto para violín en Fa♯ menor, Op. 47: II. Andante, III. Allegro
- Xavier Rodríguez VázquezHenri Vieuxtemps — Concierto para violín n.º 4 en re menor, op. 31: I. Andante. Moderato
- Gonzalo Rodríguez MartínezJohann Sebastian Bach (1685 – 1750) – Partita nº 3 en Mi mayor para violín solo, BWV 1006: Preludio y Loure Édouard Lalo (1823 – 1892) – Sinfonía española, Op. 21: I. Allegro non troppo
Pianistas acompañantes: Haruna Takebe y Damián Hernández.
Virtuosi Violini é unha asociación musical sen ánimo de lucro fundada por Anca Smeu, co-principal de primeiros violíns da Real Filharmonía de Galicia e profesora na Escola de Altos Estudos Musicais de Santiago de Compostela. A súa misión é difundir os valores e beneficios da educación musical en xeral, e en particular da arte de tocar o violín, a todos os niveis.
A filosofía de Virtuosi Violini baséase na continuidade no desenvolvemento persoal de cada músico, máis aló do talento natural: disciplina, esforzo e perseveranza son os piares para chegar a ser violinista. Ademais, a asociación organiza charlas para preparar aos pais de futuros músicos, ofrecendo ferramentas para apoiar aos seus fillos no proceso de aprendizaxe musical.
25/10 CULTURACTIVA «CASTELAO» Auditorio Minicipal 19.00 h
CASTELAO XOGA: unha tarde máxica antes da gran viaxe
Antes de marchar para Arxentina, Daniel desaparece. A súa nai non sabe onde buscalo, pero o neno Castelao recorre as rúas de Rianxo acompañado por Baltasara, unha moza que vive en todas partes e non ten ningunha casa. Entre xogos, aventuras e segredos da vila mariñeira, descubren historias da Santa Compaña, máscaras do Entroido e recunchos esquecidos, preparando a súa gran viaxe ao outro lado do océano.
O mar, un fenómeno que agarda
“O mar… O mar é un fenómeno!”, di o barbeiro de sábado. Para Daniel, de nove anos, o mar é aventura e despedida, memoria das persoas e historias que o acompañarán sempre. Esta obra transporta ao espectador a unha tarde máxica, onde todo é posible, e a liberdade e a creatividade son protagonistas.
A obra “Castelao Xoga” é froito do talento de Paula Carballeira, quen asina o texto, e da dirección de Fina Calleja, que guía a posta en escena con sensibilidade e frescura. No escenario, Mónica Camaño e Cris Collazo dan vida aos personaxes, acompañadas dun coidadoso deseño de espazo escénico realizado por Carlos Domínguez Del Río, que recrea a vila mariñeira de Rianxo e os recunchos máxicos polos que circulan Daniel e Baltasara.
O vestiario, obra de La Canalla, acompaña a narrativa coa súa cor e textura, mentres que a iluminación de Abrahán Sande crea a atmosfera precisa para cada momento, desde a maxia das historias da Santa Compaña ata a emoción da despedida. A imaxe e o material gráfico, desenvolvidos por Rocío Cibes e Víctor Rivas, reflicten a esencia visual da obra, e a composición musical de Ramón Raíndo acompaña e potencia cada escena, imprimindo ritmo e emoción. Todo este traballo está coordinado pola produción e distribución de Culturactiva S. Coop. Galega, garantindo que cada detalle contribúa a transportar ao espectador ao mundo do neno Castelao, cheo de xogo, misterio e mar.
8/11 MAGOSTO POPULAR Campo da Feira 18.00 h – BAILANDO NA RÚA CON BRINCADEIRA
Brincadeira presenta “Bailando na Rúa”, un espectáculo ao aire libre de 1h 45’ que achega ao público á música e ao baile tradicional galego. Durante a actuación, poderás gozar de todas as seccións do grupo: Baile, Gaitas e Percusión, e Pandeireteiras, nunha recreación de romaría popular na que o público está convidado a participar, cantar e bailar con nós.
O noso obxectivo é que grandes e pequenos disfruten dunha experiencia dinámica e divertida, achegándose á riqueza da cultura tradicional galega de forma amena e próxima. Co noso repertorio amplo e versátil, adaptámonos ao público para garantir que todos se sintan cómodos e contaxios de alegría e ritmo.
Brincadeira é un dos grupos máis antigos da comarca de Santiago de Compostela, formado a finais dos anos 70 para conservar e difundir o folclore galego. O noso repertorio, resultado de investigación de campo e tradición oral, reflicte a variedade e riqueza cultural de Galicia, e o noso vestiario recupera traxes e tecidos tradicionais de cada comarca.
Con máis de 50 integrantes entre bailaríns, gaiteiros e pandeireteiras, Brincadeira leva décadas participando en festivais, romarías e intercambios nacionais e internacionais, promovendo sempre o respecto e o amor pola nosa tradición.
15/11 GHAZAFELHOS «AS MINAS DO REI SALOMÓN» Auditorio Municipal 19.00 h
A nova produción de Teatro Ghazafelhos é unha peza de teatro de rúa pensada para público familiar, cunha duración de 50 minutos. A obra parodia as películas de aventuras en África dos anos 50, recreando a historia dun cazador, Quatermain, contratado por un magnate estadounidense para atopar as lendarias minas do rei Salomón.
Na súa viaxe suceden todo tipo de situacións disparatadas e cómicas: avións de hélices, loitas contra feras salvaxes e mesmo o encontro co mítico Tarzán. O ton humorístico e cheo de sorpresas busca, ademais de entreter, convidar a reflexionar sobre a importancia da preservación da natureza e da vida.
O espectáculo conta con texto e dirección de Pepablo Patinho, quen guía a posta en escena, e baséase nunha idea orixinal de Montse Piñón. O elenco está formado por Montse Piñón, Jorge Casas, Pepablo Patinho e Pablo Sánchez Pablísimo.
22/11 INVENTI TEATRO «CHEGAR E ENCHER» Auditorio Municipal 20.00 h
Chegar e encher é un canto ao fracaso, un divertido monólogo teatral de Bea Campos onde conviven a improvisación, a narración oral e o cabaré. Pasen e vexan… esta muller que está no escenario era unha nena adorable que tiña todo o que precisaba para ser feliz… pero que nalgún momento tomou decisións que a afastaron dese camiño para levala sobre as táboas dos escenario… Chegar e encher é unha ácida e divertida reflexión sobre a imposibilidade de controlar as nosas vidas e a dificultade de encaixar nos roles de xénero marcados.
Unha narración oral para público adulto que dura uns 50 minutos; a dirección e dramaturxia é da propia Bea Campos.
29/11 MAGO TETO «GALEROCK N’ MAGIC» Auditorio Municipal 19.00 h
Desde o XabaRock ata a actualidade coa maxia da música ao vivo. Galerock & Magic é un percorrido desde o rock do Xabarín Club que marcou unha xeración ata os grupos musicais actuais que están poñendo de novo a música galega no máis alto.
Moita música en directo, pero tamén moito humor e moita maxia nun espectáculo nostálxico para uns, divulgador para outros e fascinante para todas. Un espectáculo cheo de chiscadelas e abraios que dignifica e pon en valor a nosa historia musical coa ilusión como vehículo transmisor.
Dirixido por Fran Rei e protagonizado por Mago Teto, Mon Orencio e Fer Risco, Galerock & Magic é un espectáculo de maxia pensado para todos os públicos, cunha duración de 70 minutos, no que música, humor e ilusión se mesturan para ofrecer unha experiencia única.