28/09 TEATRO: MALASOMBRA PRODUCIÓNS “DE ALGO HAI QUE MORRER”
De algo hai que morrer é un espectáculo con moito humor, dese que fai rir e do que tamén por veces fai chorar, pero de risa… e faino reflexionando e falando dun tema transcendental para o ser humano. Dous prestixiosos e peculiares científicos, o profesor Jeckill e o Profesor Hyde, divulgan as súas investigacións sobre este tema que afecta ao cento por cento da poboación de todo o mundo sen distinción de raza, sexo ou condición social: A Morte.
Estes dous profesores mostrarannos algúns documentos inéditos dun valor incalculable, como é o dramático encontro de Franco con Carmen Polo e Mingorrubio, a entrevista aos funcionarios responsables da oficina de colocación do Mais Alá ou o relato de Jack e Peter, dous homes inmortais que nos poñen en alerta sobre a traxedia que supoñería a inmortalidade do ser humano para o noso planeta. Estes recoñecidos expertos, tamén nos proporcionarán asesoramento en temas prácticos como é a necesidade de estratexias á hora de negociar coas empresas funerarias, ou como pasar o casting para converterse en espírito, en pantasma ou en zombi. Coa autoridade que lle outorgan os seus amplos coñecementos, estes dous eruditos contestarán a innumerables preguntas que se fai o ser humano ao longo da súa existencia: Como é a morte? Saímos realmente do noso corpo e vémonos desde fóra? Hai vida despois da morte? Existe realmente o túnel que nos leva ao Máis Alá? Así mesmo, farán un exhaustivo percorrido polos distintos tipos de mortes atendendo á súa natureza, ou á natureza dos individuos elixidos. Para ilustrar este punto, analizarán casos prácticos como o de Carrero Blanco, John Lennon, O Fari, Amy Winehouse ou Paquirri, para poder entender mellor a nosa última experiencia vital. Dous expertos que nos revelarán algúns dos segredos máis profundos aos que se enfronta o ser humano, porque: De algo hai que morrer, aínda que sexa de risa!
Elenco: Xoque Carbajal e Jouse García
Autor: Jose Prieto
Adaptación: Xoque Carbajal
Dirección: Marcos Orsi
Vestiario: La Canalla e Diego Valeiras
Escenografía: Xoque Carbajal
Iluminación: Octavio Mas
Montaxe de son: Pepe Castro
Fotografía: Patricia Rodríguez
Vídeo: Pepe Castro
Deseño gráfico: Miguel Carbajal T.
Día: 28 de setembro de 2024
Hora: 21.00 h.
Lugar: Auditorio Municipal
Compañía: Malasombra producións (www.malasombra.gal) Xénero: Humor Clasificada: Todos os públicos Recomendada: A partir de 14 anos Duración: 70 minutos
05/10 TEATRO: GHAZAFELLOS “TRAVESÍA UNICORNIO”
Travesía unicornio é unha adaptación ao teatro de Pepablo Patinho do libro de María Canosa gañador da primeira edición do Premio Anisia Miranda de teatro infantil e publicado por edicións Embora en marzo de 2023.
Un neno e o seu unicornio atópanse cunha xenia que lles promete facer realidade os seus desexos. Estes deberán escoitarse, aceptarse e o máis importante, aceptar tamén os desexos dos demais para que se cumpran os propios. Travesía unicornio é unha obra chea de humor que cambia os roles tradicionais de xénero abrindo as portas a que as nenas e nenos decidan libremente sobre os seus gustos.
Dirección: Pepablo Patinho Escenografía e vestiario: Teatro Ghazafelhos Elenco: Jorge Casas, Montse Piñón e Pepablo Patinho
Día: 5 de outubro de 2024
Lugar: Auditorio
Hora: 19.00 h.
Duración: 50 minutos Público: familiar e infantil a partir de 5 anos
11/10 CONTACONTOS: RAQUEL QUEIZÁS “O XOGO DE NANO”
Nanocontos: Para os nosos amigos, os animais, cada día é unha nova aventura chea de cousas que aprender, mentres xogan coas cores, as formas e a música. Porque cando se é tan pequeno ata as cousas máis sinxelas se converten en todo un reto.
Os meniños reinventan o mundo cunha mirada que o ve todo pola primeira vez, abraiándose a cada paso, mentres aprenden novos nomes para os obxectos que acaban de descubrir.
Un espectáculo que estimula as habilidades de percepción espacial e psicomotricidade dos bebés a través de pequenas historias adaptadas para captar o seu interese e cunha duración apropiada á súa capacidade de atención.
Este é NANO, unha ra que medra cos contos que eu mesma invento.
Nano recibe unha visita moi especial o día do seu aniversario. Está todo preparado: a torta, as candeas, os globos. Só faltan os amigos, a que xogarán? Ao rematar terá que se bañar e descubrirá o divertido que é coñecer as partes do seu corpo ao ritmo da música.
Día: 11 de outubro de 2024
Lugar: Auditorio
Hora: 11.00 h.
Público: Escola Infantil de Val do Dubra
19/10 NARRACIÓN ORAL: MARÍA DA PONTRAGHA E BLEUENN LE FRIEC “CONTOS… ENTRE CORDAS”
En “Contos… entre cordas”, recorremos un mesmo camiño en busca dun lugar común entre as nosas dúas formas de expresión. Entre a palabra e a música ideamos a maneira de achegar a arpa e o seu repertorio a lugares onde non adoita escoitarse. A música clásica faise máis próxima atravesada polos contos que traemos. Mostrarémosche o vínculo entre as rosquillas e a música romántica, entre a tradición oral galega e o repertorio da arpa clásica, entre os contos e as cordas. A COMPAÑÍA María da Pontragha é educadora e antropóloga, dende sempre mantivo un vínculo moi forte coa tradición oral. No 2009 comezou a súa andaina no mundo da narración centrándose en todo o que rodea a oralidade. Bleuenn Le Friec é unha arpista bretoa, galega de adopción. Formada em arpa celta e clássica, e é con este instrumento que desenvolve hoxe a súa vida musical (Real Filharmonía de Galicia, Orquesta del Gran Teatre del Liceu, …) como na música de raíz galega (Zumaque, Uxía, Xoan Curiel,…).
Elenco: María Iglesias “María da Pontragha” e Bleuenn Le Friec
Público ao que vai dirixido: Público +16 anos Duración: 50 min
Día: 19 de outubro
Lugar: Auditorio
Hora: 20.30 h.
26/10 CONCERTO: VIRTUOSI VIOLINI “CONCERTO EN CLAVE DE SOL”
Virtuosi Violini é unha asociación musical sen ánimo de lucro ideada por Anca Smeu, co-principal de primeiros violíns da Real Filharmonía de Galicia e profesora na Escola de Altos Estudos musicais de Santiago de Compostela. Virtuosi Violini proponse difundir os valores e os beneficios do ensino musical en xeral, e en particular da ensino da arte de tocar o violín, a absolutamente todos os niveis.A filosofía de Virtuosi Violini baséase nun piar irrefutable do desenvolvemento persoal de cada musico, máis aló da especialización: a continuidade. Non pretendemos fomentar o estudo do violín como un mero hobby, simplemente non consideramos interesante este camiño. Promovemos unha idea sinxela: chegar a ser violinista pasa por entender tres conceptos e nesta orde: disciplina, esforzo e perseveranza.
A capacidade nativa, o talento, a facilidade, poden chegar a ser elementos extremadamente importantes, pero non absolutamente imprescindibles no estudo da arte de tocar o violín.
Así mesmo, Virtuosi Violini proponse organizar charlas en vistas a preparar aos pais dos pequenos futuros violinistas e músicos, para saber ao que se van a enfrontar e de que maneira poden apoiar aos seus fillos no camiño da aprendizaxe musical.
En programa:
1. Lucía Vieito Aradas:
– François – Schubert – A abella
– Pablo de Sarasate – Malagueña
2. Mar Fraga Enjo
– F. Kreisler – Siciliana e Rigaudon, en estilo de Francoeur
3. Gabriela Alejandra Castelo Vilasoa
– H. Wieniawsky – Obertass Mazurka
4. Sofía Quinteiro Ciobotaru
– F. Kreisler – A Folia, variacións sobre un tema de Corelli
5. Gonzalo Rodríguez Martínez
– N. Paganini – Capricho nr. 13
6. Pedro Budiño Pinaque
– W. A. Mozart – Concerto para violín non. 5 na maior, KV 219, mov. 1 Allegro aperto
Pianista: Haruna Takebe
Coa participación extraordinaria do escritor Theodor Smeu Stermin
Día: 26 de outubro de 2024
Lugar: Auditorio Hora: 20.00 h.
Público: Familiar
09/11 MONÓLOGO: LETI DA TABERNA “ENREDADAS”
Unha das máis coñecidas e seguidas creadoras de contido e humor en galego con máis de 50.000 seguidoras nas redes. Leti da Taberna trae o seu primeiro monólogo no que explora en ton irónico a nosa relación coas redes sociais e como nos inflúen no noso día a día. En galego e con perspectiva feminista, Enredadas enche o escenario de luz e enerxía, provocando que a espectadora se vexa identificada coas situacións que se presentan e acabe ríndose de si mesma.
Podedes rir un cacho na súa canle de Instagram aquí.
Elenco: Leti da Taberna Duración: 60 minutos Público: Adulto
Día: 9 de novembro de 2024
Lugar: Auditorio
Hora: 20.30 h.
16/11 MAGOSTO: ACTUACIÓNS DE BRINCADEIRA E CARUNCHOS COA XIRA DO 30 ANIVERSARIO
MAGOSTO POPULAR no Campo da feira de Bembibre: castañas asadas, chourizos, bebidas e a solidariedade veciñal aportando comidas, sobremesas para facer unha festa onde a veciñanza se sinta parte da festa.
Os espectáculos son pensados para un público familiar.
– Baile: Brincadeira con “Brincadeira de Rúa”. Brincadeira formouse a finais dos anos 70 co obxectivo de conservar e difundir a música e o baile tradicionais galegos. Os primeiros membros de Brincadeira procedían de Coros y Danzas de la Sección Femenina de Santiago de Compostela que naceran en 1942 e desapareceron durante a Transición. Deles e delas herdamos instrumentos, traxes e o gusto polo noso baile e a nosa música; pero en Brincadeira démoslle outro enfoque ao feito folclórico: queremos conservar e difundir o sentir da cultura tradicional galega que se viña transmitindo de xeración en xeración.
– Concerto: Os Carunchos nace a finais de 1994 coa idea de mesturar temas cantados co repertorio de gaiteiros solistas, conseguindo naquel momento unha formación nova e orixinal coa que Os Carunchos participan nos máis importantes festivais folk do país.
Gaita solista, percusións varias, polifonía nas voces e o acompañamento da zanfona fan que os directos de Os Carunchos sexan unha verdadeira festa chea de forza e diversión. Un xeito de facer cun compromiso activo co noso idioma e cultura moi característico, mesturando e recuperando coplas do noso imaxinario popular e dando ritmo e musica aos traballos dos nosos poetas históricos e contemporáneos. Este ano 2024 celebramos o noso 30 aniversario! Queres celebralo con nós?
– Luís E. Correa Piñeiro (Voz, gaita, requinta, zanfona e percusións)
– Pablo Rial Salgueiro (Voz, acordeón diatónico, gaita e percusións)
– Isaac Teniente Molinos (Voz e percusións)
– Juan A. Álvarez Iglesias (Voz, gaita, pínfano e percusións)
Día: 16 de novembro de 2024
Lugar: Campo da Feira
Hora: A partir das 18.00 h.
Público: Familiar
23/11 TEATRO: CULTURACTIVA “AS ALUMNAS” DIRIXIDA POR FINA CALLEJA
Premio Nacional de Literatura Dramática de 2023. Fina Calleja dirixe unha peza con Mónica Caamaño e Anabell Gago en escena partindo dun marabilloso texto de Paula Carballeira.
Un equipo do mellor da escena galega para render tributo á figura de María Barbeito cia. (unha das figuras máis importantes da historia da educación en Galicia). Un espectáculo sobre xustiza social, memoria histórica, igualdade e resiliencia. Un fermoso artefacto escénico que está tendo unha grande acollida entre o público e os profesionais.
– Premio Nacional de Literatura Dramática 2023
– Premio Follas Novas 2023 ao mellor libro de teatro
– Premio Luisa Villalta a proxectos pola igualdade
Elenco: Anabell Gago e Mónica Camaño
Dirección: Fina Calleja
Duración: 75 minutos
Público: Adulto
Texto: Paula Carballeira
Vestiario: La Canalla
Escenografía: Carlos Domínguez del Río
Día: 23 de novembro de 2024
Lugar: Auditorio
Hora: 20.30 h.
30/11 TEATRO E DANZA: MONTSE RIVERA E MERCEDES PRIETO “AS ARMADANZAS”
Mercedes e Montse son as Armadanzas, e chegan cun espectáculo no que Teatro e Danza se xuntan nunha representación que pretende poñer a bailar a todo o mundo. É unha proposta dinámica e innovadora para pór un gran de area na recuperación da do legado inmaterial galego e ser un elo na cadea de transmisión xeracional entre avós, tíos e netos. Temos dúas versións. As Armadanzas «Na Punta do pé» A proposta emprega como fío condutor a relación entre un mozo portugués, Joao e unha moza galega, Matilde, nun tempo pretérito, onde a conversa, e por extensión a música e o baile, servían como base das relacións humanas. Así, e mediante unha escenificación teatral, van introducíndose danzas galegas e portuguesas de carácter tradicional. As Armadanzas son unha boa opción para adentármonos dunha maneira amena e divertida no mundo do baile tradicional galego-portugués, nas dúas linguas irmás (coas súas semellanzas e diferenzas) e nas historias das vidas dos nosos antergos. As Armadanzas «Bailando coa lingua» Neste caso Matilde é unha moza do Courel e Xan un mozo do Condado, eles serán o fío que nos leve por este obradoiro de baile, baseado na tradición pero actualizado e teatralizado. Os asistentes van divertirse bailando e cantando en galego pezas do repertorio tradicional da nosa terra. Os temas que forman parte desta proposta son todos eles recollidos de persoas maiores pelas aldeas de Galicia, eran as cantigas, os bailes e xogos que lles aprenderan os seus maiores e cos que se divertían facendo máis levadeira a súa vida cotiá.
Elenco: Montse Rivera e Mercedes Prieto
Día: 30 de novembro de 2024
Lugar: Auditorio
Hora: 19.00 h.
Público: familiar