O legado gandeiro de Val do Dubra, en mans da mocidade

Melania Noya, Simón e Sergio Blanco e Toni Pumar son algúns dos exemplos de futuro no sector gandeiro en Val do Dubra, que “está garantido” e que actualmente conta con 133 explotacións gandeiras en activo

VAL DO DUBRA. LARA LOZANO. Había de estar orgulloso Balbino, aquel “rapaz de aldea” das Memorias dun neno labrego por ver a rapazada de Val do Dubra e a súa ilusión polo rural e por manter vivo un sector que, malia ver cuestionada a súa supervivencia, segue dando de comer a moitos. 

Moitos mamamos o amor pola gandería e o sacrificio da profesión e esta segue a ser a sorte de moitos mozos e mozas que ven na aldea tamén o seu devir profesional. En Val do Dubra continúan en activo 133 explotacións gandeiras, cun censo de 5.387 cabezas de gando bovino, un reflexo da importancia histórica deste sector no concello, especialmente no tocante ao lácteo. Así, os procesos de actualización e modernización no sector son palpables e asemade a calidade vai en aumento.

E, froito deste futuro que agora é presente, hai moita xuventude formándose en especialidades do sector e incorporándose á actividade agraria. Quen lle ía dicir a Vicente de Neiro que a súa neta, Melania Noya, da Gandería Noya Neiro SC de Niveiro se amarraría aos azos que sempre lle deu para seguir coa explotación, seguir nela e vela medrar á vez que anhela seguir formándose en variedade de escolas de xuíces de concursos morfolóxicos en España e no resto de Europa e outras especialidades. “O avó, referente onde os haxa, foi pioneiro en crear unha gandería, os meus pais seguiron ese legado e sinto a necesidade de formarme, sen deixar a raíz coa que nacín. Gústame estar vencellada ao campo e estou orgullosa de vir de onde veño”.

Con esa paixón como vínculo tamén medraron os irmáns Simón e Sergio Blanco, da Gandería Queirugueira SL, do lugar de Vilalba.Son dous rapaces de 16 e 14 anos aos que lles gustaría seguir coa granxa familiar. Simón, que actualmente cursa o ciclo medio de Agropecuario en Fonteboa e participa en diferentes concursos, destaca positivamente a evolución do sector xa que “agora hai moitos máis datos para analizar que supoñen a mellora do benestar animal, unha mellor calidade de vida”. Ambos sinalan o amor polo campo “onde todos nos axudamos e onde tamén coma individuos temos máis espazo”.

Con algúns anos máis de experiencia, no lugar de Buxán, atópase Toni Pumar da Gandería Pumar. Este mozo de 35 anos atopou na súa formación de informática-programación un dos aliados no sector, que ve que evoluciona de xeito positivo; “apoderámonos un pouco máis, porque estamos empezando a entender as explotacións coma empresas”.

Con todo, fala “dos imputs negativos do sector e do descoñecemento deste. A xente non sabe que é a PAC, non imaxina como nos prexudica a suba ou baixada de certos impostos, o reparto das axudas, o gasto e investimento diarios…”. Convida así a coñecer o sector e ver “o traballo, dedicación e esforzo que hai detrás, para saber recoñecelo”. 

Todos destacan a posta en valor do sector con respecto á época que lle tocou vivir aos seus pais. Ademais  amósanse agradecidos de ser fillos e fillas do oficio máis bonito e libre do mundo. Así, auguran un bo porvir en Val do Dubra, buscando estar á vangarda, grazas ao relevo xeracional, que “está garantido”, apuntan con afán, ao sentir isto coma unha regalía.

Podes ver a reportaxe publicada no comarcal (versión impresa) de La Voz de Galicia 29/02/24