Val do Dubra impulsa este mes de setembro dúas iniciativas para estender o uso da lingua propia entre a veciñanza, as persoas chegadas de fóra e o tecido empresarial local

Aprender galego para integrarse, para comunicarse, para traballar e tamén para devolver, en certa maneira, a acollida recibida. Con esta filosofía, o Servizo de Normalización Lingüística do Concello de Val do Dubra está a desenvolver este mes de setembro dúas iniciativas que teñen como eixo común a promoción e normalización da lingua propia: un curso de introdución á lingua e á cultura galegas para persoas procedentes do exterior e a creación dun Directorio de empresas que empregan o galego.

Dúas accións dirixidas a públicos diferentes, pero que comparten un mesmo propósito: facer do galego unha lingua máis presente na vida cotiá, nas relacións sociais e tamén na actividade económica do municipio.

O primeiro dos proxectos comezou o xoves 17 de setembro, no Centro de Formación do Concello. Trátase dunha formación gratuíta, desenvolvida en colaboración coa Secretaría Xeral da Lingua da Xunta de Galicia, e dirixida principalmente a persoas maiores de 16 anos procedentes de fóra de Galicia que queren iniciarse no galego ou mellorar as súas competencias básicas.

Nesta primeira edición participan dez persoas, cinco procedentes de Venezuela e cinco de Brasil. Ao longo de 20 horas, o alumnado coñecerá nocións básicas da lingua, desde o alfabeto, a fonética e a ortografía ata vocabulario e expresións habituais para desenvolverse en situacións do día a día. A formación complétase con contidos sobre a historia e a cultura galegas, as tradicións, as festas, a gastronomía e a música.

Entre as participantes está Luz Rangel, natural de Venezuela, que leva cinco anos vivindo en Val do Dubra. Para ela, aprender galego ten unha dimensión que vai máis alá de adquirir unha nova competencia lingüística.

“É unha forma de devolverlles aos galegos o entendemento e a acollida”, explica. Considera que, despois do tempo que leva en Galicia, chegou o momento de dar un paso máis, o de falalo: “É hora de aprender o galego para agradecer e devolver ese favor que nos fan cando cambian de lingua para que nós, os emigrantes, nos adaptemos”.

A súa motivación tamén ten unha razón práctica. Luz vive en Rial, lugar onde naceron os seus sogros e traballa en Carballo, onde no seu día a día ten contacto con clientes e provedores galegofalantes. Por iso considera que coñecer a lingua pode facilitar a comunicación e achegar maior conexión e confianza.

Despois da primeira xornada de formación, a súa valoración é moi positiva. “É práctico e ponte en situacións cotiás”, sinala á vez que sorrí ao afirmar que algunhas palabras “xa me saen en galego” de maneira espontánea.

O seu achegamento á lingua ten tamén un referente moi próximo. O seu fillo participou no Club de Debate de Alingua, tamén desenvolvido polo servizo de normalización, e converteuse tamén nunha especie de mentor neste proceso de aprendizaxe.

A súa experiencia resume unha das intencións do curso: que as persoas que chegan de fóra non vexan o galego como unha barreira, senón como unha ferramenta para participar plenamente na sociedade na que viven.

Esta vontade de normalizar o galego esténdese tamén ao ámbito profesional. O Concello de Val do Dubra puxo en marcha este mes o Directorio de empresas que empregan o galego, unha iniciativa destinada a visibilizar os comercios, empresas e profesionais locais que utilizan a lingua galega na súa actividade.

A inscrición no directorio é voluntaria, gratuíta e aberta ao tecido empresarial local. A través dun formulario, as empresas e profesionais poden sumarse á iniciativa e facer visible o seu compromiso co galego.

A proposta parte da idea de que empregar a lingua propia tamén pode ser unha forma de xerar proximidade e confianza coa clientela, ademais de reforzar a identidade e o compromiso co territorio. Aquelas empresas, comercios, hostalería… que o desexen poden inscribirse no formulario que atoparán en www.valdodubra.gal