O Concello de Val do Dubra recepciona a obra da
mellora da eficiencia enerxética na Casa da Cultura

O Concello de Val do Dubra vén de rematar a obra de Mellora enerxética na Casa da Cultura. O proxecto foi subvencionado con axudas da Xunta destinadas a impulsar a eficiencia enerxética nas infraestruturas vinculadas á prestación de servizos municipais, cofinanciadas con fondos FEDER para o período 2024-2025.

O proxecto, cun orzamento total de 128.807,40 euros, contemplou tres liñas de actuación principais:

1. Mellora da envolvente térmica do edificio, mediante a instalación dunha nova cuberta de panel sandwich de aceiro galvanizado con illamento de la de roca de 5 cm, e a colocación dun falso teito illado tamén con la de roca de 5 cm de espesor.

2. Renovación do sistema de iluminación interior, coa substitución das luminarias actuais por equipos LED de baixo consumo, así como a implantación dun sistema de control e regulación da iluminación artificial.

3. Actualización do sistema de calefacción, que inclúe a integración de fontes de enerxía renovable (substitución da actual solo radiante eléctrico por unha bomba de calor).

As obras foron executadas por unha empresa local, INSATEL. Con esta iniciativa, o Concello de Val do Dubra dá un paso máis no seu plan de mellora das infraestruturas municipais, apostando por instalacións públicas máis eficientes, respectuosas co medio ambiente e cun menor custo de mantemento a longo prazo xa que suporá un aforro económico considerable.

Nos próximos meses daranse máis pasos na mellora da eficiencia noutras instalacións municipais, como é o caso do Auditorio Municipal.