O Concello de Val do Dubra presenta a programación da 42ª Festa do Emigrante 2026

O Concello de Val do Dubra acolleu esta mañá a presentación oficial da programación da 42ª edición da Festa do Emigrante, que se celebrará os días 6, 7 e 8 de agosto de 2026. O cartel recolle unha ampla oferta de actividades culturais, deportivas, gastronómicas e musicais, consolidando unha cita xa tradicional no calendario festivo do municipio.

A programación dará comezo o xoves 6 de agosto coa XXXVIII Festa da Cervexa, que contará coas actuacións de Dosenpunto, Leite con Jalletas e Ferre DJ, nunha noite dedicada á música e ao ambiente festivo.

O venres 7 de agosto celebrarase a xornada institucional da festa, coa Misa Solemne e o acto oficial de apertura na Casa do Concello, acompañado da A.X.Regueifa e cuxo acto central será a homenaxe ao escultor Xosé Castiñeiras, creador da escultura ao Emigrante. Pola tarde terá lugar unha nova edición do Jran Prix, mentres que a noite estará marcada pola gran verbena coas orquestras Origen e Marbella, xunto coa discomóbil EME Music.

A programación concluirá o sábado 8 de agosto cunha intensa xornada de actividades para todas as idades. O día arrancará co torneo de petanca, seguido do pasarrúas coa charanga Os Celtas, a tradicional sardiñada popular, a final do torneo de petanca, un torneo de xadrez, teatro de rúa a cargo de AsSircópatas con Rogelio III La Fête , e o Torneo de Fútbol Emigrante. A festa pecharase cun gran concerto e verbena protagonizados pola orquestra Metrópolis, o artista galego Ortiga e EME Music.

Con esta programación, a Festa do Emigrante volve apostar por unha combinación de tradición e lecer, ofrecendo tres días de actividades pensadas para todos os públicos e convertendo Val do Dubra nun punto de encontro durante o verán. A organización anima á veciñanza e ás persoas visitantes a participar nesta 42ª edición, que un ano máis reunirá música, gastronomía, deporte e cultura nunha das celebracións máis destacadas do municipio.

A organización da 42ª Festa do Emigrante corre a cargo da Asociación Cultural Emigrante, co apoio do Concello de Val do Dubra e da Deputación da Coruña.