O Concello de Val do Dubra pon en marcha servizos de podoloxía e fisioterapia dirixidos ás persoas usuarias do Servizo de Axuda no Fogar (SAF)

O Concello de Val do Dubra pon en marcha o servizo de podoloxía para usuarios do Servizo de Axuda no Fogar (SAF) e nas próximas semanas tamén activará o servizo de fisioterapia a domicilio dirixido a beneficiarios da SAF maiores de 65 anos. Esta oferta forma parte do programa impulsado polo Concello de Val do Dubra para atender a crecente demanda e necesidades da veciñanza co fin de mellorar a súa calidade de vida.

O servizo de podoloxía, que xa está operativo desde hai unhas semanas, permite aos usuarios acceder a coidados especializados para a saúde dos pés sen necesidade de desprazarse, garantindo así unha atención máis cómoda e accesible. Este servizo é fundamental para a prevención e tratamento de afeccións podolóxicas que poden afectar a mobilidade e benestar dos usuarios, especialmente os de idade avanzada ou con dificultades de desprazamento.

Ademais, o Concello de Val do Dubra ten previsto activar en breve un novo servizo de fisioterapia e rehabilitación, tamén no marco do SAF, que se atopa en fase de contratación. Este ofrecerá tratamentos personalizados para mellorar a mobilidade e aliviar a dor. A fisioterapia a domicilio permitirá unha atención continuada e adaptada ás necesidades individuais de cada persoa, favorecendo así unha recuperación e rehabilitación máis efectiva e un mellor benestar físico.

Ambos servizos, dirixidos aos usuarios con menor capacidade económica, buscan dar resposta a demandas dos dubreses e dubresas con maior dependencia facilitando a atención das doenzas sen necesidade de trasladarse dos domicilios. 

Os servizos financiados integramente pola Deputación da Coruña e o Concello de Val do Dubra.