O Concello de Val do Dubra pon en marcha o programa “Parroquias en Movemento” dirixido a maiores de 55 anos

O Concello de Val do Dubra pon en marcha o programa “Parroquias en Movemento” dirixido a maiores de 55 anos

Val do Dubra, 13 de agosto de 2025 – O Departamento de Servizos Sociais do Concello de Val do Dubra pon en marcha a iniciativa “Parroquias en movemento”, un programa pensado para persoas maiores de 55 anos que busca fomentar a actividade física, mellorar a saúde e favorecer a socialización nas parroquias do municipio. 

As sesións realizaranse a partir de setembro naquelas parroquias que conten con local social ou parroquial e  que teñan un número mínimo de veciños e veciñas inscritas no programa.

O programa ten como obxectivo previr o deterioro físico e cognitivo nas persoas maiores mediante un traballo integral que combina corpo e mente. Propón exercicios de mantemento, suaves e moderados, deseñados para conservar a forma física e estimular as capacidades cognitivas. Estas actividades favorecen unha constitución flexible, áxil e forte, fomentando unha correcta educación postural, ao tempo que promoven a atención, a memoria e a coordinación. Así, as persoas participantes poden coñecer e controlar mellor o seu corpo e a súa mente, reforzando o benestar xeral.

En canto aos exercicios físicos, contribúen ademais a mellorar a mobilidade articular, reducir a atrofia muscular e diminuír o risco de lesións, promovendo un coidado integral de todo o organismo.

Para participar, as persoas interesadas poden informarse chamando ao 628 474 389. As inscricións deben formalizarse no Rexistro Xeral do Concello de forma presencial ou na sede electrónica ata o 29 de agosto.

Non se require experiencia previa, e está aberto a toda á veciñanza. Non perdas a oportunidade de formar parte desta iniciativa pensada para coidar o corpo, mellorar a saúde e compartir momentos agradables cos veciños e veciñas.

Ese programa conta coa colaboración da Deputación da Coruña.