O Concello de Val do Dubra pon en marcha as actividades do programa de Envellecemento Activo a partir do 16 de setembro

A partir do 16 de setembro, o Concello de Val do Dubra iniciará o seu Programa de Envellecemento Activo, unha iniciativa deseñada para fomentar a saúde, o benestar e a participación social das persoas maiores do municipio. As actividades 

desenvolveranse de luns a venres, en horario de 16:00 a 20:00 horas, no Centro de Formación (Rúa Corredoira).

As persoas interesadas en participar poden obter máis información nos Servizos Sociais do Concello de Val do Dubra. A inscrición poderá formalizarse de forma presencial no rexistro xeral do concello ou a través da sede electrónica. Ademais, tamén será posible inscribirse presencialmente unha vez comezadas as actividades, no propio horario e ubicación das mesmas. 

Ademais das xornadas de tarde, este ano como novidade haberá actividades en horario de mañá algúns días ao mes. Estas actividades matinais serán xornadas nas que os nosos maiores poderán participar en diferentes cuestións da vida do municipio como a feira, as festas da localidade coma o Entroido, accións que se desenvolvan en conxunto con centros educativos ou aquelas de promoción da igualdade.

Este programa representa unha excelente oportunidade para que as persoas maiores do concello manteñan un estilo de vida activo e participativo, nun entorno acolledor e estimulante.