O Concello de Val do Dubra convoca un
concurso de lemas contra a violencia de
xénero co gallo do 25 de novembro

En conmemoración do Día Internacional da Eliminación da Violencia contra a Muller, que se celebra o vindeiro 25 de novembro, o Concello de Val do Dubra, a través da súa Concellería de Igualdade, lanza un
concurso de lemas co obxectivo de sensibilizar e promover a participación cidadá na loita contra a violencia de xénero.

O concurso, baixo o nome “Concurso de Lemas contra a Violencia de Xénero do Concello de Val do Dubra”, pretende converter os lemas en símbolos de cambio, mensaxes que cheguen a unha ampla audiencia e inspiren a rexeitar esta lacra social. O certame está aberto a todas as persoas maiores de 12 anos, sempre que estean empadroadas no Concello de Val do Dubra. Ademais, os rapaces e rapazas de entre 12 e 18 anos que estuden no municipio tamén poderán participar, aínda que non estean mpadroados. Cada participante poderá presentar un único lema, que deberá estar escrito en galego, xa sexa a man ou en formato dixital. É imprescindible que os lemas sexan orixinais e inéditos.

Premios para fomentar a creatividade e o compromiso
Para incentivar a creatividade e o compromiso, o Concello premiará os mellores lemas con
tarxetas agasallo de cine, valoradas en 60, 40 e 20 euros, acompañadas dun libro cun valor
de 20 euros para cada un dos tres primeiros postos. Así, o Concello espera recoñecer o
esforzo e o enxeño das persoas participantes, cuxos lemas poden converterse en
ferramentas clave na loita contra a violencia de xénero.

Criterios de presentación e prazos
As persoas interesadas en participar deberán entregar os seus lemas antes do 13 de novembro de 2024, ás 14:00 horas. As propostas poderán presentarse presencialmente no Rexistro Xeral do Concello de Val do Dubra ou enviarse por correo electrónico ao enderezo ualdade@valdodubra.gal. No caso de entrega en man, os lemas deben introducirse nun sobre pechado, co lema do concurso escrito no exterior, e dentro doutro sobre pequeno cos datos de contacto. Se a entrega é por correo electrónico, os participantes deberán enviar dous arquivos: un co lema e un pseudónimo, e outro cos datos persoais completos.
Criterios de valoración
O xurado, presidido pola concelleira de igualdade, Raquel Mallo Domínguez, valorará as mensaxes polo seu carácter claro, conciso e a súa facilidade para ser lembrado. Ademais, destacarase a orixinalidade e creatividade dos lemas, que deben reflectir os valores da igualdade de xénero e rexeitar todo tipo de violencia. Para garantir o respecto e a calidade dos lemas, tamén se avaliará o uso dun linguaxe non exista. Lemas que promovan a violencia ou resulten denigrantes serán automaticamente eliminados.

Anuncio gañadores/as
Os lemas gañadores daranse a coñecer o 15 de novembro de 2024. Como parte dos actos
previstos polo Concello para o 25 de novembro, todos os lemas participantes serán expostos ao público, reafirmando o compromiso de Val do Dubra na loita contra a violencia de xénero e na promoción da igualdade.

O propio 25 de novembro, xa está programada a lectura do manifesto do 25N na Casa do Concello ás 12.00 horas.

Para máis información, as persoas interesadas poden contactar coa Concellería de Igualdade no correo igualdade@valdodubra.gal.