O Concello de Val do Dubra aproba por unanimidade o POS+2026

Val do Dubra, 5 de febreiro de 2026.– O Pleno do Concello de Val do Dubra, celebrado en sesión extraordinaria na mañá de hoxe, aprobou por unanimidade, cos votos a favor dos 9 concelleiros asistentes (3 votos do PSOE, 3 votos de Anova e 3 do PP), o Plan Provincial de Cooperación ás Obras e Servizos de Competencia Municipal (Plan Único de Concellos) POS+2026, así como o Plan Complementario correspondente ao exercicio 2026.

No marco do POS+2026, o Concello executará un conxunto de actuacións destinadas á mellora de infraestruturas e servizos básicos en diferentes parroquias do municipio.

A primeira das actuacións, cun investimento de 173.323,44 euros, contempla a mellora de viarios no núcleo de Xermil, en San Román, e inclúe tamén a mellora da Praza do Campo da Feira en Bembibre; a mellora do camiño á Pedra do Home en Portomouro; a limpeza de gabias no camiño das Cerqueiras, en Rebordelos (Arabexo); así como a limpeza de gabias na vía da Cabada a Quintáns e na zona da Igrexa, en Paramos.

A segunda actuación, cun importe de 156.114,82 euros, permitirá a mellora do viario da Fonte en Rebordelos (Arabexo), e inclúe ademais a mellora do viario das Cañotas-Cornes en Buxán e a mellora do acceso a Portomeiro.

No Plan Complementario 2026 aprobáronse dúas intervencións de relevancia. Por unha banda, a execución de beirarrúas en Nariño (Niveiro), pola marxe esquerda, cun investimento de 217.416,04 euros. Por outra, a creación dunha rede de saneamento en Erviñou, cun orzamento de 200.041,69 euros.

Ademais das actuacións en infraestruturas, o Pleno aprobou destinar 349.404,22 euros a gasto corrente, co obxectivo de reforzar servizos municipais esenciais como o alumeado público, a recollida de lixo e o mantemento dos centros escolares; este importe serve para paliar a suba dos custos que se levan producido nestes servizos nos últimos anos.