O Concello de Val do Dubra aproba o orzamento municipal logo de tres anos prorrogado

O Concello de Val do Dubra aprobou o orzamento municipal para o exercicio de 2024 durante a sesión plenaria celebrada onte 2 de xullo. Este orzamento, que saíu adiante cos votos a favor do equipo de Goberno e coa abstención do Partido Popular, ascende a un total de 2.965.432,99 euros, sendo igualado nos seus estados de ingresos e gastos e garantindo así estabilidade orzamentaria e principio de equilibrio.

O alcalde de Val do Dubra, Diego Luís Díaz Méndez, presentou o orzamento, que “aínda que chega tarde” é unha necesidade xa que o último que se aprobara era o do ano 2021 e por tanto “o Concello necesitaba unhas contas actualizadas que respondan ás necesidades actuais e que sirvan actuar máis axilmente”. Díaz sinala que se trata do orzamento “máis elevado da historia do Concello de Val do Dubra, ten un carácter responsable e é extremadamente realista prestando unha especial atención ao eido social”. Ao mesmo tempo, o alcalde quixo agradecer o traballo dos servizos económicos para sacar adiante estas contas.

Por outra banda, o tenente de alcalde e voceiro de Anova, Antonio Negreira Noya destaca “que este orzamento é dos mellores posibles, que recolle dunha forma bastante clara os programas dun cogoberno, amosando a filosofía e o modo de entender a política dos grupos”. Negreira sinala tamén que con este orzamento se “pon fin a unhas desigualdades laborais onde a mesma xente facendo o mesmo traballo cobraba menos” e destaca tamén “o enfoque social, algo que indica a liña que leva este cogoberno.” “Esta será unha ferramenta para permitirnos facer e axilizar, unha ferramenta de transparencia para os grupos da oposición para comprobar os gastos”.

Pola súa parte, o voceiro do Partido Popular, José Manuel Varela Ferreiro, entre outras cousas, fixo referencia ao gastos correntes, “cabe recordar que a inversión que se fixo en aforro enerxético deriva nun aforro económico importante na actualidade; e o destinado á asistencia aos nosos maiores é importante e cada vez debería ser maior”. Tamén fixo referencia ás axudas ás asociacións que deberían “intentar adaptalas á realidade de agora, serían cantidades que tampouco van supoñer moito, pero que axudarían a aquelas están subsistindo e quedaría máis repartida a contía das asociacións”. Varela tamén fai referencia aos 16.000 euros de inversión que contempla o orzamento, que considera “unha inversión pobre”.

Con respecto ao orzamento, entrando de fondo nalgunhas cuestións a destacar, aumenta o importe destinado ao eido social, especialmente no servizo de Axuda no fogar pola demanda no municipio; sendo así o 68% destinadas na área de Protección e promoción Social. Este incremento supón o axuste noutras áreas, un exemplo é a diminución dun 31% no gasto en infraestruturas e mantementos que se intentará suplir con outras axudas da Deputación ou da Xunta.

En canto ao persoal da entidade, reflíctese a suba do 2,5% a persoal funcionario para esa anualidade, tal como marca o Estado, e con carácter retroactivo. 

En canto ao persoal laboral tamén se contempla ese axuste salarial do 2,5% e a maiores contémplase unha contía anual de 50.000 euros co fin de facer unha suba nos soldos máis baixos, coma o persoal de escola infantil ou operarios, entre outros á espera de aprobación do Convenio Laboral.

Outro dos eidos a ter en conta é o relativo ás subvencións nominativas que se mantén con incremento nalgunhas entidades, coma o SD Dubra que se estima unha suba de 5.000 euros anuais pola recuperación do equipo feminino e a incorporación de novas entidades: Dubra Team, Motoclub Val do Dubra, Vento Libro e Asociación Medioambiental de Niveiro.

En canto a ingresos por taxas e prezos públicos sofren unha mínima variación de importe. Neste exercicio, o Concello de Val de Dubra, que conta con contas nas entidades bancarias Santander e Abanca, estima tamén unha achega na partida de ingresos duns 70.000 euros anuais polos rendementos destas contas.

O orzamento conta co respaldo de informes técnicos elaborados polos servizos económicos e de secretaría do Concello de Val do Dubra.