O comercio local de Val do Dubra reactívase coa posta en marcha de novas apostas

A pandemia da COVID-19 trouxo consigo retos sen precedentes para o comercio local en moitos lugares, pero Val do Dubra está a experimentar unha verdadeira reactivación económica que atende ás novas demandas da veciñanza. Nos últimos anos, o concello foi testemuña dun incremento de negocios de diversa índole, que conviven en harmonía cos establecementos tradicionais que levan anos ofrecendo servizo e atención de calidade aos veciños e veciñas.

Hoxe en día, quen vive en Val do Dubra pode atopar unha ampla variedade de servizos sen necesidade de saír do municipio. O tecido comercial local ampliouse con novas propostas que van dende un centro de adestramento, un salón de estética de uñas, unha tenda de mobles, unha lavandería… ata unha axencia de publicidade e marketing. Tamén unha coñecida panadería acolleu un novo formato, adaptándose ás novas demandas dos consumidores e, ampliando a oferta de locais, tamén houbo a reapertura dunha cervexería. 

A estas novas iniciativas súmanse a apertura dun salón de peiteado en Rial, dun supermercado e unha gasolineira en Paramos, que ofrecen novas opcións de benestar tanto á comunidade local como aos veciños doutros concellos próximos.

O sector da saúde tamén experimentou un crecemento significativo coa recente inauguración dun centro de fisioterapia e dunha clínica dental, reforzando así a oferta sanitaria dispoñible. O sector turístico colle pulo cos pisos turísticos que veñen de darse de alta no municipio, a maioría en Portomouro, así como co recente cambio de xerencia dun coñecido hotel, que promete revitalizar a oferta hostaleira da zona.

A expansión comercial non fixo esquecer os negocios de sempre, que seguen a ser referentes na vila. Moitos deles están a vivir unha transición xeracional, coa incorporación dos fillos e fillas dos fundadores, garantindo así a continuidade e a calidade do servizo.

En paralelo, emerxe tamén unha nova xeración no sector primario, impulsando un recambio xeracional que se traduce na concesión de novas licenzas para explotacións gandeiras en Val do Dubra.

Esta convivencia entre as novas iniciativas e os establecementos de sempre está a crear unha sinerxía única, ofrecendo oportunidades a emprendedores que achegan innovación sen perder a esencia e bo facer dos negocios tradicionais.

Val do Dubra preséntase así como un exemplo de adaptación e dinamismo, onde o comercio local continúa a ser o motor da vida comunitaria. Hostalería e comercio son, sen dúbida, a primeira elección dos dubreses e dubresas, que poden atopar todo o que precisan sen ter que saír da localidade.