NOTA INFORMATIVA SOBRE O PROXECTO DE INSTALACIÓN DUN VERTEDOIRO NA CANTEIRA PEDRA FACHA

Como xa se veu informado publicamente dende este Concello, a antiga canteira Pedra Facha, situada no termo municipal de val do Dubra (Niveiro), unha vez que tivo cesado na súa actividade mineira, atópase afectada por un proxecto de rehabilitación e rexeneración que incluiría, segundo a empresa promotora do mesmo, a instalación dun vertedoiro de residuos non perigosos que ocuparía o espazo mineiro en desuso da dita canteira e, polo tanto, de considerables dimensións e gran impacto.

Unha vez que a empresa promotora do proxecto ten iniciado, ante os órganos competentes da administración autonómica, as actuacións e trámites administrativos necesarios para a súa autorización, tense solicitado ao Concello de Val do Dubra, por resultar un trámite obrigado, informe sobre a compatibilidade do dito proxecto co planeamento urbanístico municipal (informe de compatibilidade urbanística); que ten emitido en sentido negativo, por considerar que se ben a rexeneración da canteira resultaría urbanisticamente compatible, non o sería que esta inclúa a creación do pretendido vertedoiro de residuos.

E contra este informe de incompatibilidade urbanística do vertedoiro que, polo tanto, impediría a súa autorización administrativa, a entidade promotora ten alegado en vía administrativa e, posteriormente, por vía xudicial; téndose producido unha recente sentenza favorable aos intereses da empresa, pois implicaría o recoñecemento da compatibilidade urbanística do vertedoiro. Fallo xudicial ao que segundo un Auto recibido o pasado 19 de decembro non cabe recorrer en segunda instancia. Non obstante, logo de analizar a resolución o Concello ten decidido presentar recurso de casación ante o Tribunal Supremo, para dese xeito esgotar todas as vías xudiciais, administrativas e políticas para a defensa dos intereses xerais municipais que se entenden gravemente lesionados por este proxecto de vertedoiro, de indiscutible e considerable impacto medioambiental e socioeconómico, tanto presente como futuro; e para o que tamén se contará coa asesoría dunha empresa especializada en materia medioambiental coa finalidade de que poida axudar ao Concello nunha oposición técnica e fundamentada ao dito proxecto.

Aproveitamos para lembrar que a veciñanza pode canalizar todas as cuestións medioambientais que considere que poidan ser interesantes a través dos seguintes contactos da empresa encargada do análise medioambiental do proxecto:
Teléfono: 981 94 24 82

Enderezos electrónicos:

vbouzas@tysgal.com
lbibian@tysgal.com