LETRAS GALEGAS

O Concello de Val do Dubra únese ás actividades que se levarán a cabo co gallo da celebración do Día das Letras Galegas 2023, que se dedica á figura de FRANCISCO FERNÁNDEZ DEL RIEGO, que desenvolveu dende a década de 1930 un traballo constante e recoñecido a favor da cultura galega, sendo unha das personalidades máis destacadas de Galicia. Foi un dos principais artífices da Editorial Galaxia e director da revista Grial nos seus primeiros cen números. Ensaísta e narrador, foi autor dunha extensa obra centrada sobre todo na cultura e na literatura galega. Pertenceu á xeración de intelectuais xurdidos arredor do Grupo Nós e durante a República foi membro do Seminario de Estudos Galego e do Partido Galeguista.

Para máis información deixámosvos dúas ligazóns, a primeira, do académico correspondente Ramón Nicolás (https://academia.gal/letras-galegas/2023/francisco-fernandez-del-riego/biografia) e a segunda con toda a programación académica, musical, expositiva, social, publicacións, etc., que se lle dedica para honrar a súa figura e traxectoria https://www.cultura.gal/gl/letras-galegas-2023

As actividades que levará a cabo o Concello co gallo da celebración das Letras Galegas 2023 serán as seguintes:

1. Exposición no Centro de Formación Municipal dende o 2 de maio do traballo CAMIÑANDO CON RAMÓN SANFIZ, COÑECEMOS A FRANCISCO FERNÁNDEZ DEL RIEGO, elaborada polo IES Castelao de Vigo, premiada no Concurso das Letras Galegas 2023 na categoría de secundaria, bacharelato e outras ensinanzas.

2. Actuación do grupo MIGALLAS TEATRO coa obra FALEMOS COMO GALEGAS o día 27 de maio ás 18.00 no Auditorio Municipal.

Por que a situación da lingua galega é a que é? Cales son os falsos tópicos máis comúns sobre ela? Que son a “diglosite” e a “castrapite”? De onde veñen os prexuízos sobre a lingua? A quen afectan? Teñen cura? Que remedios hai para tratalos? Cal é o futuro do galego?

“Falemos como galegas” é un espectáculo humorístico interactivo onde se tratan estas e outras moitas cuestións relativas á lingua galega a través de sketchs e cancións cómicas de autor.

As cancións, alén de cuestións sociolingüísticas, tratan temas como a defensa da cultura propia e do patrimonio natural, a influencia dos medios de comunicación, a publicidade, a moda, o clasismo etc.

Cada función de “Falemos como galegas” é unha invitación amena e divertida a reflexionar sobre a historia, a actualidade e o futuro da lingua galega, co obxectivo de fomentar o seu uso normalizado entre as galegas e galegos de todas as idades.