Exposición pintura Antonio Martínez

Nesta edición da Festa do Emigrante inauguramos a exposición de pintura de Antonio Martínez.

Antonio, nado en Rebordelos, Val do Dubra, leva 40 anos vivindo en Xenebra, onde reside coa súa familia. A pesar de estar lonxe da súa terra natal, o seu amor por Galicia e a súa paixón pola pintura foron unha constante na súa vida. Pintor autodidacta, este veciño atopa na arte un medio para expresar a súa profunda conexión coa súa orixe.

A exposición, que estará aberta ata finais de ano no salón de plenos da Casa do Concello, inaugurouse o sábado. Nesta mostra, poderemos apreciar unha serie de obras que reflicten a beleza do Val do Dubra, con representacións de igrexas, paisaxes, aldeas, recunchos da arquitectura popular galega e persoas destacadas como o noso gaiteiro O Churrero, que tanto teñen contribuído á nosa música.

Antonio lembra con especial agarimo a súa terra natal e a casa onde naceu. Leva sempre a Galicia no corazón, e por iso decidiu crear esta colección. Algunhas das obras forman parte da súa colección privada, mentres que outras estarán á venda.

Agardamos contar coa vosa visita!