Enquisa ambiental

O cambio climático supón unha ameaza ambiental, social e económica. O quentamento do sistema climático é inequívoco, e os fenómenos externos derivados do mesmo, como as secas e as inundacións son cada vez máis frecuentes e intensos. No caso de Val do Dubra, os desbordamentos son frecuentes cada ano, e o núcleo de Portomouro onde conflúen o río Dubra e o Tambre é a máis afectada, alterando incluso as actividades cotiás da poboación. Nos últimos anos, a auga anegou o patio do CEIP Xacinto Amigo Lera.

O Concello de VAL DO DUBRA está situado no interior da provincia da Coruña, a medio camiño entre Santiago de Compostela e Carballo, conta con 4.033 habitantes segundo os últimos datos publicados polo IGE (ano 2015) repartidos nunha superficie de 109 km2 que se extenden ao longo da cunca do río Dubra ata a desembocadura no río Tambre.

Atendendo ás características naturais en termos xeográficos de VAL DO DUBRA, estamos a falar dun Concello cun 50% de superficie forestal e atravesado por numerosos cursos de auga, algúns deles de importante envergadura, o que o convirte nun territorio especialmente exposto ao cambio climático, onde levar a cabo actuacións de carácter preventivo ten un carácter crucial. Estas actuacións deben garantir unha especial atención á adaptación da realidade do Concello aos desafíos que o cambio climático presenta nunha área coas características naturais deste Concello, así como ter en conta a especial incidencia de fenómenos meteorolóxicos asociados ao mesmo, e as súas consecuencias en termos ambientais, sociais e económicos.

O Concello de Val do Dubra dispón dunha Ordenanza reguladora da limpeza obrigatoria de terreos forestais e de soares en solo urbano ou de núcleo rural e outras accións preventivas contra incendios forestais. Este foi o primeiro intento para acadar a prevención dos seus montes e áreas colindantes e no ano 2009 redactou un Plan de prevención e defensa contra incendios forestais no que se identifican as zonas con maior risco de incendio (imaxe á marxe), no que se define a rede de defensa contra incendios forestais do Concello e no que se describe a proposta de actuación.

Coa intención de consolidar a cultura de prevención en materia de riscos e adaptación ao cambio climático, fundamentalmente no referente a incendios e inundacións, o Concello de VAL DO DUBRA pretende elaborar unha estratexia orientada a:

• Contribuir de xeito eficaz ao cumprimento dos compromisos asumidos por Galicia e España en materia de cambio climático.
• Potenciar o desenvolvemento sostible do Concello mediante o fomento do uso de enerxías máis limpas, principalmente renovables, e o uso racional dos recursos.
• Establecer mecanismos de gobernanza que posibiliten a participación e coordinación dos diferentes axentes implicados na loita contra o cambio climático, a través dun proceso aberto.
• Incrementar o coñecemento, a concienciación e a sensibilización da cidadanía para a acción na mitigación e adaptación ao cambio climático.
• Fomentar a investigación, o desenvolvemento e a innovación en materia de cambio climático e enerxías limpas.
• Estudar os impactos do cambio climático sobre o territorio.
• Establecer un sistema de indicadores que garanta o adecuado seguimento das actuacións que se poidan realizar no marco da Estratexia.
• Mellorar o coñecemento do clima de Galicia e a avaliación do impacto que o cambio climático pode ter no Concello.
• Estudar os principais impactos, as súas consecuencias e a forma de minimizar os devanditos impactos dentro das diferentes áreas de actividade.
• Investigación, desenvolvemento tecnolóxico e innovación en materia medioambiental.

ENQUISA AMBIENTAL

CARTEL DO PROXECTO