Clausura do programa Xuventude 2023 promovido polo Concello de Val do Dubra en colaboración coa Baña, Negreira e Santa Comba e  no que participaron 13 rapaces e rapazas

Este luns 30 de setembro celebrouse a clausura do Programa de Emprego Xuventude 2023, dirixido a menores de 30 anos en situación de desemprego do Concello de Val do Dubra, así como dos municipios da Baña, Negreira e Santa Comba. O acto no que participaron os alumnos, contou coa presenza de diversas autoridades como Juan José Couce, director territorial de emprego da Xunta de Galicia, Diego Luis Díaz, alcalde de Val do Dubra; Alberto Romar, alcalde de Santa Comba; Teresa Duro, concelleira de Negreira; Vanessa Gil, concelleira de A Baña e Antonio Negreira, primeiro tenente de alcalde de Val do Dubra. 

No acto, agradeceuse o labor e implicación do profesorado, a dirección do obradoiro e ás axentes de emprego local, así como do persoal municipal de Val do Dubra implicado na xestión do programa. 

Un total de 13 alumnos e alumnas completaron con éxito o programa; 7 deles formados na especialidade de Dinamización de Actividades de Tempo Libre Educativo, Infantil e Xuvenil, e outros 6 en Atención Sociosanitaria a Persoas no Domicilio.

O obradoiro Xuventude 2023, financiado pola Consellería de Promoción do Emprego e Igualdade, tivo unha duración dun ano. Esta iniciativa, promovida polo Concello de Val do Dubra en colaboración cos concellos de A Baña, Negreira e Santa Comba, tivo como obxectivo principal ofrecer unha formación teórico-práctica que facilitase a inserción laboral dos participantes.

Con esta formación, os alumnos e alumnas non só adquiriron coñecementos teóricos, senón que tamén tiveron a oportunidade de traballar en actividades reais, o que lles permitirá mellorar as súas opcións de acceso ao mercado laboral.

O Programa Xuventude 2023 foi un éxito grazas ao esforzo conxunto dos catro municipios implicados e á dedicación dos alumnos e docentes.