Aprobado en pleno o Convenio Colectivo do Persoal Laboral ao servizo do Concello de Val do Dubra

O Concello de Val do Dubra aprobou, con 6 votos a favor do PSOE e ANOVA e 4 abstencións do PP, o Convenio Colectivo do persoal laboral ao servizo do municipio en sesión plenaria ordinaria celebrada ás 21.00h do xoves 19 de setembro. Trátase da creación dun instrumento que nunca chegou a ter vixencia en Val do Dubra ata o momento, pese a unha aprobación que se levara a cabo no mandato 2015-2019 e que nunca entrou en vigor e despregou os seus efectos.

A aprobación deste instrumento, ten respaldo orzamentario, cunha partida presupostaria de 50.000€, que xa se contemplaba nos Orzamentos aprobados para o ano 2024, e que se destinarán a facer fronte ás cantidades económicas que veñen estipuladas para lograr a equiparación.

Respecto ao aspecto retributivo, máis alá do incremento salarial, o novo convenio establece un sistema retributivo único para todo o persoal laboral, baseado en criterios obxectivos e en función da súa clasificación profesional. Deste xeito, elimínanse as diferenciacións inxustificadas que existían ata agora. Ademais, créase un sistema de clasificación profesional único e común para todo o persoal laboral, asimilado ao do persoal funcionario.

De carácter xeral, o Convenio formaliza e recoñece legalmente a equiparación do persoal laboral municipal co persoal funcionario en canto a condicións e dereitos laborais básicos. Entre estes, destacan a xornada laboral, permisos, licenzas e o acceso á carreira profesional, garantindo que ambos colectivos gocen de dereitos laborais idénticos.

En paralelo tamén se está a traballar nunha RPT que se pretende que tamén inclúa e defina  os postos de persoal laboral (xunto cos dos funcionarios).

Neste pleno tamén foron aprobadas por unanimidade unha modificación das bases das subvencións nominativas para incluír unha axuda a unha veciña de Val do Dubra, que presentou un proxecto relacionado coa antropoloxía en Montevideo, por un importe de 300€.

A maiores fixáronse os festivos locais para o 2025, quedando así a Ascensión, que será o 29 de maio, e a Festa do Emigrante, o 1 de agosto.