Aprobadas as obras e actuacións do Plan Provincial POS+2025

Esta mañá celebrouse unha sesión de pleno extraordinario no Concello de Val do Dubra na que se aprobaron por unanimidade, as intervencións incluídas no Plan Provincial de Cooperación ás Obras e Servizos de Competencia Municipal (Plan Único de Concellos) POS+2025. Este plan inclúe investimentos importantes para a mellora das infraestruturas do municipio, co obxectivo de favorecer o acceso entre núcleos, atender as necesidades básicas de urbanización e apoiar o desenvolvemento local.

Entre as actuacións máis destacadas figuran a mellora do viario entre Vilalba e Bascuas en Coucieiro, cun orzamento de 106.869,56 €, que tamén inclúe actuacións de viarios de Arnexo, na parroquia de Rial,  viario en Portomeiro e a pista de Xermil a Carreira en San Román);  a mellora do viario de Cornes a Portomeiro, cunha achega de 116.852,32 €, e a urbanización da rúa Río en Bembibre e a mellora do acceso nunha pista do Rieiro en Rial, cunha partida de 115.210,09 €. 

Estas tres intervencións suman un total de 338.931,97 €, financiados integramente pola Deputación da Coruña.

Ademais, tamén se aprobou a modificación do acordo do Plan Provincial POS+ Adicional 1/2025, destinado a proxectos financeiramente sostibles, entre os que se inclúen a mellora do núcleo de Vilar en San Román e a mellora da pista do Fondón en Portomouro e a mellora do viario do Outeiro en Arabexo, cun orzamento de 173.049,80 €, e a mellora do camiño de Arnexo á DP 1914 (pistas ás lagoas do Picoto), mellora dun camiño da Lesta a Portomeiro e a apertura dun camiño en Portomouro, cun investimento de 128.963,38 €. 

O total destinado a estas actuacións ascende a 302.013,18 €. 

Paralelamente, aprobouse unha partida adicional de 328.963,38 € para gasto corrente, atendendo ás necesidades económicas do municipio.