A Telleira, emblema de Val do Dubra, revivirá como espazo multifuncional para a veciñanza

Entrando en Bembibre, na capital de Val do Dubra, vindo do lado de Compostela, xa desde o lonxe e malia a dificultade que impoñen os pulmóns verdes de arboredo que se levantan á beira do Dubra, vemos a torre da Telleira. Os seus 25 metros son guía do municipio e un símbolo de identidade local que vai formar parte dun novo capítulo na súa centenaria historia.

O histórico edificio da antiga fábrica de tella de Bembibre, coñecida como A Telleira, está afrontando un cambio… Nun prazo estimado de seis meses, o que hoxe son ruínas transformarase nun espazo social multifuncional, chamado a converterse nun punto de encontro para a veciñanza e a vida do municipio.

Construída a comezos do século XX por Celestino Amigo Oreiro, A Telleira é unha testemuña silenciosa da tradición industrial de Val do Dubra. Este conxunto, vestixio da antiga fábrica, dá nome á zona e evoca unha época na que a produción de tellas era un motor económico na comarca. Nas instalacións engadiuse posteriormente unha central hidroeléctrica e unha acea na que se moía trigo e millo, manténdose en activo algo máis de medio século.

A rehabilitación non só busca preservar esta icona arquitectónica, senón tamén recuperar elementos históricos como as antigas turbinas e canalizacións de auga, que formaban parte do sistema hidráulico empregado na fábrica. Estes elementos serán postos en valor no proxecto, integrándoos como parte do futuro espazo; recoñecendo así o seu potencial etnográfico, pedagóxico e didáctico da parte que corresponde á central.

O edificio principal, de 350 metros cadrados en planta baixa, será convertido nun espazo diáfano e multifuncional. Segundo o proxecto, o novo centro adaptará os seus usos ás necesidades da veciñanza, podendo albergar actividades como exposicións culturais, encontros sociais ou eventos colaborativos complementando os espazos actuais de actividades no municipio. A estrutura orixinal será respectada, mantendo a súa esencia, ao mesmo tempo que se moderniza para acoller os novos usos.

A rehabilitación da fábrica, cuxo proxecto inicial sufriu un cambio de orzamento e de proxecto polo Goberno actual, foi adxudicada á empresa Sergonsa Servicios, SL cun orzamento que ascende aos 585.894,06 euros. A maiores, destinaranse outros 87.000 euros para a mellora dos espazos interiores e exteriores, grazas ao financiamento do GDR Terras de Compostela e da Axencia Turismo de Galicia, no marco do Plan de Recuperación, Transformación e Resiliencia financiado polos fondos europeos Next Generation UE.

Esta intervención busca non só preservar o patrimonio cultural de Val do Dubra, senón tamén impulsar o desenvolvemento económico e social da zona, atraendo actividades culturais, turísticas e colaborativas que revaloricen o territorio. Nuns poucos meses converterase nun centro que unirá o pasado e o presente nun espazo cargado de memoria e significado para a comunidade.