A disposición da veciñanza o modelo de alegacións ante o proxecto de rehabilitación da canteira na que se pretende crear o vertedoiro de Niveiro

As alegacións poderán presentarse en calquera rexistro público ata o 24 de febreiro

O Concello de Val do Dubra e a Asociación Medioambiental de Niveiro celebraron unha reunión informativa aberta á veciñanza para abordar o estado actual do proxecto do vertedoiro de Niveiro. Actualmente, e tras a presentación pública do proxecto de rehabilitación da canteira na que se pretende facer o vertedoiro, ábrese prazo de alegacións. Posteriormente, de seguir adiante o proxecto, levaranse a cabo novas fases de alegacións contra o propio proxecto da creación do vertedoiro.

Durante o encontro, a empresa encargada da elaboración das alegacións municipais explicou en detalle o proxecto, os posibles impactos ambientais e sociais, así como os seguintes pasos a seguir no proceso administrativo. Tamén participaron o avogado e o técnico da asociación ecoloxista ADEGA, que ofreceron asesoramento técnico e legal á cidadanía.

Na reunión, facilitouse información actualizada sobre a situación do proxecto e o Concello de Val do Dubra informou de todas as actuacións feitas ata o de agora. Así mesmo, púxose a disposición de todas as persoas interesadas un modelo de alegacións individuais. Deste xeito, cada veciño e veciña poderá presentar as súas reclamacións de forma oficial en calquera rexistro público ata o 24 de febreiro, prazo límite para a exposición pública do proxecto de rehabilitación, peche e abandono da explotación mineira de Pedra Facha (autorización número 73), promovida pola empresa Francisco Gómez y Cía, S.L.

Para facilitar o acceso á documentación, o Concello de Val do Dubra informou que as alegacións estarán tamén dispoñibles en formato físico na Casa do Concelloe poden descargarse na web do www.valdodubra.gal no seguinte enlace:

http://valdodubra.gal/wp-content/uploads/2025/01/Alegacions_vecinanza_Vertedoiro_Niveiro.pdf

Por outra banda, a concentración cacerolada prevista para non puido levarse a cabo debido ás adversas condicións meteorolóxicas.

O Concello de Val do Dubra e a Asociación Medioambiental de Niveiro – Plataforma Niveiro Veciños animan a veciñanza a seguir participando activamente no proceso de alegacións para que a súa voz sexa tida en conta neste asunto de gran relevancia ambiental e social para a zona.

Para máis información, as persoas interesadas poden contactar coa Asociación Medioambiental de Niveiro – Plataforma Niveiro Veciños a través do número de teléfono 614 217 712.