A Asociación de Mulleres Rurais Val de Dubra e Aldeando organizan, en colaboración co Concello de Val do Dubra, unha masterclass solidaria de zumba en favor de ASANOG o 3 de novembro

A Asociación de Mulleres Rurais “Val do Dubra” e Aldeando organizan, en colaboración do Concello de Val do Dubra, unha Masterclass Solidaria de Zumba o vindeiro domingo, 3 de novembro, no pavillón municipal de Val do Dubra, de 17:00 a 19:30 horas. 

O evento ten como obxectivo recadar fondos en favor de ASANOG, a Asociación de Axuda a Nenos Oncolóxicos de Galicia.

A actividade contará coa participación de recoñecidos instrutores galegos, ademais da presenza especial do instructor invitado dende América, Marce Soto, coñecido como “A enerxía do baile”. A masterclass será unha oportunidade para gozar dunha tarde de deporte e solidariedade.

As entradas terán un custo de 5 euros para adultos e 3 euros para nenos, co fin de colaborar con esta importante causa. Poden mercarse no pavillón municipal de Val do Dubra de luns a xoves de 19.00 a 21.00 h. e na asociación Mulleres Rurais Val Do Dubra. Tamén poderán adquirise no propio día do evento, a partir das 16.00 horas no pavillón municipal.

Animamos a todos os veciños e veciñas, así coma visitantes, a participar ou vir de espectadores ao evento.

Información ASANOG:

ASANOG é unha asociación sen ánimo de lucro que nace no ano 2012 cun obxectivo primordial: contribuír a mellorar a situación dos nenos e adolescentes con cancro e as súas familias en Galicia.

A Asociación nace por iniciativa dun grupo de familias que un día recibiron o golpe demoledor de saber que o seu fillo ou filla fora diagnosticado dunha enfermidade oncolóxica. Pais e nais para os que a convivencia no hospital lles facía ver que os momentos compartidos aliviaban a dor, que o apoio mutuo era unha axuda inestimable. O principal obxectivo de ASANOG é contribuír ao seu benestar non só no aspecto médico, senón tamén no psicolóxico, sanitario, laboral, económico e outros esenciais para poder dar o apoio axeitado nesta delicada situación.