Lugares de Interese

Pedra do Home

En Portomouro, parroquia na que existe unha ponte á que lle debe o seu nome, pois “Portomouro” quere dicir ponte antiga (ponte que estaba antes da chegada dos romanos), no máis alto dun monte ao lado do río Tambre, na estrada de Fondón á Igrexa, atópanse unhas tumbas antropomórficas coñecidas como “Pedra do Home”, nunha situación claramente estratéxica, pois quizais se sitúe a orixe do enterramento nun cemiterio para os “vixiantes” do paso do Tambre, no século IV-VIII, datas nas que se sitúan as tumbas rupestres antropomórficas.

A Fervenza

O concello a través do ruta de sendeirismo “Das Carballeiras”, para chegar ata unha fervenza situada entre os lugares de Gontar (parroquia de Coucieiro) e Insua (parroquia de San Román). Este sendeiro atravesa as fermosas carballeiras do río Dubra no seu paso por Bembibre, chega ata as ruinas da ermida de San Xoán Bautista, e acaba percorrendo as beiras do río, augas arriba cara Bembibre, rematando novamente na mesma Área Recreativa.

Igrexa de Paramos

Indo pola estrada de Santa Comba podemos deternos e botar unha ollada á igrexa de Paramos, un bonito exemplar do típico estilo románico rural galego, con nave e ábside de planta rectangular. No testeiro ábrese unha xanela con columnas e unha ancha arquivolta axedrezada. Sobre o piñon da ábside puxeron unha sinxela cruz, pero ollando máis enriba, sobre o da nave, vemos outra máis traballada e interesante, inscrita nun círculo. A sacristía, que está adosada o muro meridional do ábside, é claramente posterior, probablemente da época na que foi restaurado o templo, 1646, data que figura alí mesmo unha inscrición.

Área recreativa

En Bembibre, nunha paisaxe inigualable, a carón do río Dubra e rodeada de salgueiros atópase esta área recreativa que conta con: piscina municipal (abre nos meses de verán), área de descanso, merendeiro, parque de xogos infantil… na que durante o verán se celebran moitos actos, destacando entre outros Pescadubra (para nenos e minusválidos) e o Campamento Urbano.

Vistas dende o Picoto

Dende O Campo de Carlexo (Rial) sae unha pista asfaltada que vai dar ás antenas de repetición dos sinais de televisión, no monte coñecido como “O Picoto”. Éste é o punto máis alto de todo o val (525m), e dende alí tense unha visión privilexiada de case todo o Val do Dubra.